O idioma é a chave
coa que abrimos o mundo:
o salouco máis feble,
o pensar máis profundo.
O idioma é a vida,
o coitelo da dor,
o marmurio do vento,
a palabra de amor.
O idioma é o tempo,
é a voz dos avós
e ese breve ronsel
que deixaremos nós.
O idioma é un herdo,
patrimonio do pobo,
maxicamente vello,
eternamente novo.
O idioma é a patria,
a esencia máis nosa,
a creación común
meirande e poderosa.
O idioma é a forza
que nos xungue e sostén.
Se perdemos a fala
non seremos ninguén!
O idioma é o amor,
o latexo, a verdade,
a fonte da que agroma
a máis forte irmandade.
Renunciar ao idioma
é ser mudo e morrer.
precisamos a lingua
se queremos vencer!
A fala - Manuel María
Os meus parabens aos creadores deste blog, entre todos debemos conservar a nosa maior riqueza. Este vídeo amosa toda a realidade. Repito, os meus parabens e anímovos a que sigades traballando como vindes facendo ata agora. Unha aperta.
ResponderEliminarMoitas grazas, traballamos con moita ilusión co fin de conservar a nosa lingua
Eliminar